Novas

O 21 e 22 de xuño tivo lugar na illa de A Toxa a oitava edición do Atlantic Workshop on Energy and Environmental Economics (AWEEE). Trátase dun encontro científico bienal nacido no 2004, organizado por Economics for Energy, en colaboración con ECE (ETH Zurich) e a Universidade de Münster (CAWM) e o apoio de ECOBAS. O obradoiro converteuse nunha importante oportunidade para a discusión e debate sobre o estado da arte en cuestións enerxéticas e ambientais, cun número limitado de participantes de todo o mundo. O AWEEE combina sesións plenarias sobre temas específicos impartidos por académicos de prestixio coa presentación de investigacións realizadas por oradores convidados e outros participantes, incluíndo unha poster session, mediante unha invitación aberta para traballos.

Nesta edición, o AWEEE contou coa colaboración de Grupo REDE no seu Comité a través da participación de dous dos seus membros, os investigadores Xavier Labandeira e Carlos de Miguel. O taller incluíu sesións plenarias por parte de Christiane Baumeister (University of Notre Dame) e Don Fullerton (Universidade de Illinois en Urbana-Champaign), presentacións invitadas de Kathy Baylis (Universidade de Illinois en Urbana-Champaign), Sébastien Houde (Universidade de Maryland) Juan Pablo Montero (PUC Chile), Katrin Rehdanz (Universidade de Kiel) e Katheline Schubert (Universidade de París 1) e sesións paralelas de artigos científicos nas que tamén interviñeron Xavier Labandeira e Carlos de Miguel (Universidade de Vigo), entre outros. 

+ info: https://eforenergy.org/toxa/index.php