Novas

Beatriz Yordi, Directora de Mercados de Carbono e Mobilidade Limpa da UE, advirte, na xornada celebrada no marco do proxecto 4I-Traction, de que a dependencia dos combustibles fósiles é unha trampa para Europa.

O pasado 10 de setembro de 2024, tivo lugar en Santiago de Compostela a xornada "O Camiño á Neutralidade Climática: Reflexións desde Galicia e Europa", organizada por ECOBAS e o grupo REDE no marco do proxecto europeo H2020 4I-Traction. Este evento reuniu a representantes clave do sector público e privado para debater sobre o camiño cara a unha Europa climaticamente neutra e as estratexias de transición necesarias en Galicia.

Paula Mª Uría Traba, Directora Xeral de Enerxías Renovables e Cambio Climático da Xunta de Galicia, foi a encargada de inaugurar a xornada. Seguidamente, Beatriz Yordi, Directora de Mercados de Carbono e Mobilidade Limpa da Comisión Europea, explicou os principais avances e as liñas clave en materia de política climática para os próximos anos, desde unha perspectiva europea.

A continuación, o investigador de REDE Pol Fontanet presentou os principais resultados do proxecto 4I-Traction, que tivo como obxectivo estudar como avanzar cara a políticas climáticas transformadoras a través da innovación, os investimentos, as infraestruturas e a integración sectorial.

Finalmente, a mesa redonda "Políticas para mudar o rumbo", moderada polo Director Adxunto de ECOBAS e investigador do grupo REDE, Xavier Labandeira, permitiu un intercambio enriquecedor de ideas. Entre os participantes estiveron Beatriz Yordi; Oriol Sarmiento, Xerente do Clúster de Enerxías Renovables de Galicia; e Jacobo Aboal, Director da Axencia Galega da Industria Forestal. Este panel abordou as políticas clave para acadar a neutralidade climática, nun contexto de transición enerxética e económica para Galicia. O peche foi a cargo da Directora Científica de ECOBAS, María L. Loureiro, e o Secretario Xeral da Oficina de Coordinación Económica da Xunta de Galicia, Juan Carlos Reboredo.

A xornada concluíu cun espazo de networking entre os asistentes, reforzando o compromiso conxunto de diferentes sectores na loita contra o cambio climático.

O evento na prensa:

- Faro de Vigo
- El Correo Gallego
- Galicia Press
- Dinamotecnica